鈒骨車買邊部好？

之前好多同學問我邊部鈒骨車好，workshop內有兩部唔同牌子鈒骨車，我都係嗰句「各有各好」。多得之前有位朋友肯借部brother機俾我玩下，咁不如擺埋一齊比較下啦～

利申：以下意見純屬本人個人意見，並沒有接受任何品牌贊助。

	Brother 2504D	Janome MyLock 644D	Pfaff Hobbylock 2.0
正價	$3,699	$4,890	$3,900
體積	（最大）	v （最細）
外型設計			v（純粹個人喜好）
穿線	v	v
垃圾兜	v	v	（網袋無咁方便清潔）
鈒細圈、彎位			v
機械驅動力		v
控制慢速	v（腳踏幅度大D）	（腳踏幅度較小）	v（腳踏幅度大D）
噪音	差不多，後面有video 示範
方便清潔		v
燈	v（白色LED）	（鎢絲燈膽）	v（白色LED）

（“v” 代表較優勝）

size嚟講，應該係Janome 會相對細一D，其次係Pfaff 同Brother。而作為外貌協會會員就覺得Pfaff個樣靚仔D。

穿線，係大家都最擔心嘅環節，其實，三部都有圖解教你穿嘅，步驟係有輕微唔同但其實都大同小異。Janome嗰部我用得最耐都穿得最熟，所以對於我嚟講會穿得快少少，但我相信其實只要穿多幾次就會熟。

操作方面呢，基本上大家都係咁用嘅，用法一樣。而Brother 及 Pfaff就可以將左邊的平台拆走，令你鈒圓桶型嘅時候可以套入去（譬如袖圈），Pfaff更可以套更細嘅圈。而Janome是不能的。另外，Brother嘅起靴制在右手邊，唔係習慣嘅靴後面，我開頭都用咗少少時間搵，不過我知道好多人都習慣直接用手剔起個靴，所以其實都無乜所謂。仲有，我覺得Brother 及 Pfaff相對容易控制到較慢嘅速度，不過如果喜歡飛車的話，就一定係Janome，因為Janome就係會有種無論點都好“去”嘅感覺。

聲音，很多人介意鈒骨車好嘈。三部都一樣嘈。可能聲線有D唔同，但我覺得都係大聲嘅。

逐部點評嘅話：

Janome係我用嘅第一部鈒骨車，用咗5年，而且使用率咁高，但都無乜大問題出現過，仍然勇往直前，我覺得都算係咁。唯一唔鐘意佢嘅係用鎢絲燈膽，開得耐會好熱，而且會容易燒，燒咗就要換，換就要拆開鈒殼，大費周章。舊年嘗試過換一次，結果都失敗咗，最後放棄直接冇燈照用。

Pfaff係俾佢個樣吸引咗先嘅。總係覺得比起日本機偏向圓滑嘅線條，歐洲機硬朗嘅線條係型仔D。佢應該要做到嘅都做到，亦冇咩特別唔好。腳踏控制上會可以控制到慢D嘅速度，所以新手可能會無咁驚。而可以拆走左邊個平台變細頭係驚喜，不過就唔可以好似Janome咁左右都開到蓋清潔。另外佢個裝垃圾嘅網袋就唔及膠兜好用。

Brother因為係朋友借機俾我玩，所以唔係太多經驗。當我第一次穿好線試車是就鈒到條非常完美嘅線，完全唔需要調教任何嘢，係驚喜嘅，亦都好車。佢可以控制到較慢嘅速度，對新手嚟講都幾容易上手。貫徹Brother一貫user friendly嘅設計，佢穿線都唔會太複雜。比較埋價錢，我覺得性價比都高，只係見到實物覺得比睇相大部D。

---

**測試僅以日常最基本操作為主，無測試其他特別功能。